අඩි 35,000ක් ඉහළ අහසේදී හදිසියේ හෘදයාබාධ‍යක් ඇති වුණොත්,අලුත් ජීවිතයක් ලැබූ ඇය ගැන ඇසෙන විශ්මයජනක පුවත මෙන්න..

එය අහඹුවක්ද..? නැතිනම් සැබවින්ම එය වාසනාවද..? මේ කියන්න යන්නේ උඩුගුවනේ සිදුවුණු තවත් පුදුමසහගත කතාවක්.. 

මේ සිද්ධිය වෙනකොට යානයේ සිටි කිසිවෙකුටත් වුණෝ කුමක්ද කියන එක හිතාගන්නවත් බැරි වෙන්න ඇති.. ඒත් අවසානයේ වෙලා තියන දේ දන්නවාද..?

හරියටම මේ සිද්ධිය වෙන්නේ 2003 නොවැම්බර් මස, අඩි 35,000ක් ඉහළ අහසේදීයි. එය ලොව මවිත කළ එක්තරා අහඹු සිදුවීමක්. එය හුදෙක් වාසනාවට වඩා එහා ගිය, වෘත්තීය නිපුන්තාවය සහ සූදානම ජීවිතයක් බේරාගත් ආකාරය පිළිබඳ සංවේදී කතාවක්.

එංගලන්තයේ මැන්චෙස්ටර් නුවර සිට ෆ්ලොරිඩාව බලා පියාසර කරමින් තිබූ ගුවන් යානයක සිටි 67 හැවිරිදි ඩොරති ෆ්ලෙචර් මහත්මියට හදිසියේම දරුණු හෘදයාබාධයක් වැළඳුණා. ඒ වන විට යානය අඩි 35,000ක් ඉහළ අහසේ පියාසර කරමින් තිබූ අතර, රෝහලක් හෝ හදිසි ප්‍රතිකාර ඒකකයක් අහලකවත් නොවුණා. තිබුණේ පටු මංතීරු සහ සීමිත ඔක්සිජන් ප්‍රමාණයක් පමණි.

"යානයේ වෛද්‍යවරයෙක් සිටීද?"

ඩොරති මහත්මිය සිහිසුන්ව ඇද වැටෙද්දී, ගුවන් කාර්ය මණ්ඩලය වහා ක්‍රියාත්මක වී එම බියකරු නිවේදනය නිකුත් කළා..
"මෙම යානය තුළ වෛද්‍යවරයෙක් සිටීද?"

සාමාන්‍යයෙන් මෙවැනි අවස්ථාවක එක් අයෙකු හෝ දෙදෙනෙකු ඉදිරිපත්වීම සිරිත වුවද, එදින එම යානයේ සිදුවූයේ කිසිවෙකුත් අපේක්ෂා නොකළ දෙයක්. එක් අයෙකු නොව, හෘද රෝග විශේෂඥ වෛද්‍යවරුන් (Cardiologists) 15 දෙනෙකු එකවර අසුන්වලින් නැගී සිටි‍යා.

මෙම වෛද්‍යවරුන් පිරිස එක්සත් ජනපදයේ පැවැත්වීමට නියමිතව තිබූ වෛද්‍ය සම්මේලනයක් සඳහා ගමන් කරමින් සිටි විවිධ රෝහල්වලට අයත් ප්‍රවීණයන් පිරිසක්..

වහා ක්‍රියාත්මක වුණු වෛද්‍ය පිරිසෙන් එක් වෛද්‍යවරයෙක් ඇයගේ හෘද ස්පන්දනය නිරීක්ෂණය කළා. තවත් අයෙකු ඔක්සිජන් ලබා දීම පාලනය කළා. සෙසු පිරිස යානයේ තිබූ සීමිත වෛද්‍ය කට්ටලය භාවිත කරමින් ඇයට අවශ්‍ය මූලික ඖෂධ ලබා දුන්නා.

කිසිදු කලබලයකින් තොරව, වසර ගණනාවක පුහුණුව සහ අත්දැකීම් භාවිත කරමින් ඔවුන් ඩොරතිගේ ජීවිතය මරණයෙන් මුදා ගැනීමට කටයුතු කළා.

වෛද්‍යවරුන්ගේ උපදෙස් මත යානය වහාම උතුරු කැරොලිනා වෙත හරවා හදිසියේ ගොඩබස්වන ලද අතර, එහිදී ඩොරති මහත්මිය රෝහල් ගත කළ අතර, දින කිහිපයක දැඩි සත්කාර ඒකකයේ ප්‍රතිකාරවලින් පසු ඇය සුවය ලැබුවා. ඇය එම ගමන ගියේ තම දියණියගේ විවාහ මංගල්‍යයට සහභාගී වීමට වන අතර, මෙම වෛද්‍යවරුන් නිසා ඇයට එම අවස්ථාවට සහභාගී වීමට හැකිවුණා.

"මම හිතන්නේ මම ලෝකයේ වාසනාවන්තම කාන්තාව" යැයි පසුව ඇය මාධ්‍යයට පවසා තිබුණා.

මෙය හුදෙක් අහඹු සිදුවීමක් ලෙස පෙනුනද, සැබවින්ම එය දශක ගණනාවක කැපවීම සහ ඕනෑම මොහොතක සේවයට සූදානම්ව සිටීමේ වටිනාකම කියාපාන ජීවමාන සාක්ෂියක්.