අස්වැසුම දීමනා සම්බන්ධයෙන් මේ දිනවල සමාජ මාධ්ය ඔස්සේ විවිධ තොරතුරු හුවමාරු වෙමින් පවතී. ඒ අතරින් ඇතැම් පිරිස් අතර පැතිර යන ප්රධාන කතාවක් වන්නේ අස්වැසුම මුදල් දෙවරක් ගෙවා ඇති බවට පළවන තොරතුරුය.
එවැනි තොරතුරු හේතුවෙන් තම බැංකු ගිණුමට මුදල් දෙවරක් බැර වී තිබේද, නැතිනම් එය සාමාන්ය මාසික දීමනාවක්ද යන්න පිළිබඳව ඇතැම් ප්රතිලාභීන්ට ගැටලු මතුවිය හැකිය.
සැප්තැම්බර් මාසයේ දීමනාව ගැන නිල තොරතුර
සුබසාධක ප්රතිලාභ මණ්ඩලය විසින් නිකුත් කළ තොරතුරුවලට අනුව 2026 සැප්තැම්බර් මාසයට අදාළ අස්වැසුම දීමනාව සැප්තැම්බර් 16 වන දින ප්රතිලාභීන්ගේ බැංකු ගිණුම් වෙත බැර කිරීමට නියමිතව තිබුණි.
පළමු අදියර යටතේ පවුල් 999,053කටත්, දෙවන අදියර යටතේ පවුල් 213,335කටත් මෙම මාසික දීමනාව අදාළ විය. ප්රතිලාභීන්ට එම මුදල් සැප්තැම්බර් 17 වනදා සිට ලබාගැනීමට හැකි බවද නිල වශයෙන් දැනුම් දී තිබුණි.
එහෙම නම් දෙවරක් මුදල් ලැබුණු බව කියන්නේ ඇයි?
අස්වැසුම යටතේ විවිධ කාණ්ඩ සහ අදියර යටතේ ගෙවීම් සිදුකරන බැවින් බැංකු ගිණුමේ ගනුදෙනු පිළිබඳව යම් අවුලක් ඇති විය හැකිය.
එමෙන්ම ඇතැම් අවස්ථාවල දීමනා ගෙවීම් සහ විශේෂ දීමනා එකිනෙකට වෙනස් ගෙවීම් ලෙස බැංකු ගිණුමට බැර විය හැකිය.
උදාහරණයක් ලෙස 2026 සැප්තැම්බර් මාසයේදී වයස අවුරුදු 70ට වැඩි වැඩිහිටියන් සඳහා වෙනම වැඩිහිටි දීමනාවක්ද ගෙවීමට කටයුතු කර තිබුණි. පළමු හා දෙවන අදියර යටතේ වැඩිහිටියන් 696,612 දෙනෙකු සඳහා එම දීමනාව සැප්තැම්බර් 3 වනදා ගිණුම්ගත කිරීමට නියමිතව තිබූ බව නිල තොරතුරු පෙන්වා දෙයි.
ඒ නිසා ගිණුමට ගෙවීම් දෙකක් පෙනීම පමණින් එකම දීමනාව දෙවරක් ගෙවා ඇති බව නිගමනය කළ නොහැකිය.
ගිණුමට මුදල් ලැබී නැත්නම්?
සුබසාධක ප්රතිලාභ මණ්ඩලය සඳහන් කරන ආකාරයට අයදුම්කරු ලබාදී ඇති තොරතුරුවල ගැටලු, බැංකු ගිණුම් තොරතුරු සමඟ නොගැළපීම, ජාතික හැඳුනුම්පත් අංකය ස්ථාන දෙකක පැවතීම වැනි කරුණු මෙන්ම තාක්ෂණික ගැටලුද මුදල් ගිණුමට නොලැබීමට හේතු විය හැකිය.
එවැනි ගැටලුවක් තිබේ නම් අදාළ ප්රාදේශීය ලේකම් කාර්යාලයෙන් හෝ අස්වැසුම 1924 ක්ෂණික ඇමතුම් අංකයෙන් තොරතුරු ලබාගැනීම සුදුසුය.
0 Comments