වාහනයක් ගන්නද ඉන්නේ? මහ බැංකුවෙන් වාහන ගැන වැදගත් නිවේදනයක්

 

වාහනයක් මිලදී ගැනීමට බලාපොරොත්තුවෙන් සිටින ඔබට මුදල් සැලසුම් කර ගැනීමේදී අවධානය යොමු කළ යුතු වැදගත් කරුණක් මේ වන විට තිබෙනවා.

ශ්‍රී ලංකා මහ බැංකුව විසින් 2026 මැයි මාසයේදී වාහන සඳහා ලබාදෙන ණය පහසුකම් සම්බන්ධයෙන් පවතින උපරිම Loan-to-Value (LTV) සීමා තවත් දැඩි කර තිබෙනවා. මහ බැංකුව සඳහන් කළේ වාහන ආනයනය හා ණය වර්ධනය සම්බන්ධයෙන් ඇති විය හැකි අවදානම් සැලකිල්ලට ගනිමින් මෙම පියවර ගත් බවයි.

වාහනයක් ගන්න යන අයට මෙයින් අදහස් වන්නේ කුමක්ද?

LTV යනු වාහනයේ වටිනාකමට සාපේක්ෂව බැංකුවක් හෝ මූල්‍ය ආයතනයක් ලබාදෙන ණය මුදලේ ප්‍රතිශතයයි.

ඒ අනුව LTV සීමාව අඩු වීමෙන්, වාහනයක් මිලදී ගැනීමේදී සම්පූර්ණ මිලෙන් වැඩි කොටසක් තමන්ගේ මුදලින් ගෙවීමට සිදුවිය හැකියි.

සරලව කිව්වොත්, වාහනයක් ගන්න කලින් “මාසික ලීසිං වාරිකය කොච්චරද?” කියන එක විතරක් නොවෙයි, “මුලින් මට කොපමණ මුදලක් ගෙවන්න සිදුවේද?” කියන කරුණත් සැලකිල්ලට ගත යුතුයි.

වාහන මිලදී ගැනීමට පෙර මේ කරුණු බලන්න

වාහනයක් මිලදී ගැනීමට අදහස් කරන අය තමන්ගේ ආදායම, දැනට පවතින ණය සහ මාසික වියදම් සලකා බලා මුදල් සැලසුමක් සකස් කර ගැනීම වැදගත්.

ඒ වගේම බැංකුවෙන් හෝ ලීසිං ආයතනයෙන් ලබාදෙන නවතම ණය සීමාව, පොලී අනුපාතය, මුල් ගෙවීම සහ අනෙකුත් ගාස්තු පිළිබඳව පැහැදිලිව විමසීම සුදුසුයි.

වාහන ආනයනය ගැනත් මහ බැංකුවේ දත්ත

වාහන ආනයන සීමා 2025දී ක්‍රමයෙන් ඉවත් කිරීමෙන් පසු වාහන ආනයනය සැලකිය යුතු ලෙස ඉහළ ගොස් තිබෙන බව මහ බැංකුව පෙන්වා දී තිබෙනවා. 2025 වසරේ වාහන ආනයනය සඳහා වැය වූ මුදල ඇමරිකානු ඩොලර් බිලියන 2ක් පමණ වූ බවද මහ බැංකුවේ වාර්තාවල සඳහන්.

2026 ජනවාරි සිට ජූලි දක්වා කාලය තුළ පෞද්ගලික හා වාණිජ වාහන ඇතුළු මෝටර් රථ ආනයනය සඳහා වැය වූ මුදල ඇමරිකානු ඩොලර් බිලියන 1.495ක් ලෙස මහ බැංකුව වාර්තා කර තිබෙනවා.

ඒ නිසා වාහනයක් මිලදී ගැනීමට සැලසුම් කරන ඔබ වාහනයේ මිල පමණක් නොව ණය සීමා, මුල් ගෙවීම සහ මාසික වාරිකයත් හොඳින් සලකා බැලීම වැදගත්.